Referentes Galegas presentouse ao público en decembro de 2018 na Cidade da Cultura en Santiago de Compostela. Posteriormente realizáronse presentacións en Lugo, Ourense, Santiago, Vigo, Viveiro e A Coruña. Coa intención de dar un paso máis e dar recoñecemento ás profesionais galegas que destacan no noso territorio, o 20 de setembro de 2023, tivo lugar a presentación de Referentes Galegas en casa de Galicia en Madrid.
O evento foi guiado pola presentadora de televisión Silvia Jato. A benvida correu a cargo da presidenta da asociación, Carla Reyes Uschinsky; a secretaria xeral de Igualdade, Sandra Vázquez Domínguez; e o xefe de gabinete da Casa de Galicia en Madrid, Javier Vázquez Prado; ofrecendo un cálido recibimento aos asistentes.
O evento foi un éxito que sumou máis de 100 asistentes entre socias, Referentes e amigos da asociación e auotridades entre os que figuraron: a secretaria xeral de Igualdade, Sandra Vázquez; a deputada de Igualdade e Benestar Social de Pontevedra, Sandra Bastos; e a deputada pola Coruña no Congreso dos Deputados, Tristana Moraleja.
Tras as presentacións proxectouse un vídeo promocional do proxecto, repasando os detalles do proxecto que xa é o buque insignia da asociación. A mesa de referentes reuniu a Irene Milleiro, directora de Ashoka España; María Rúa Aguete, directora executiva en Omdia; Yolanda Román, responsable de Relacións Institucionais de Amazon en España e Almudena López do Pozo, conselleira delegada de Pymar.
O comunicador Luís Fraga, foi o encargado de moderar a mesa, onde se xerou un enriquecedor debate no que se falou dos retos aos que estas profesionais tiveron que enfrontarse nas súas carreiras polo feito de ser mulleres.
O evento concluíu cunha actuación da violinista Sara Areal, que deleitou á audiencia co seu talento musical. Finalmente, todos os asistentes gozaron dunha degustación de produtos baixo os selos Galicia Calidade e Experiencias de Calidade – estes últimos proporcionados pola Axencia Galega de Calidade Alimentaria–, pechando así unha intensa xornada.