Cursou a súa licenciatura en Santiago de Compostela e estudos de posgrao na Universidade de Londres. En 1990 accedeu á cátedra de Filoloxía Inglesa e desde setembro de 2018 é Catedrática Emérita.

É autora de numerosas publicacións e conta con seis sexenios de investigación. Dirixiu 25 tese doutoral e foi investigadora principal de nove proxectos e axudas do Plan Nacional de I+D e de quince autonómicos. En 1980 obtivo o Premio Extraordinario de Doutoramento da Facultade de Filosofía e Letras da USC, e en 1997 o Premio de Investigación 1996 da Xunta de Galicia.

Entre as súas actividades para organismos internacionais poden mencionarse a dirección da revista indexada Folia Linguistica, entre 2005 e 2013, e os seus servizos á Societas Linguistica Europaea. Desde o 1 de setembro de 2018 é Presidenta Electa desta asociación de lingüistas, unha das de maior importancia a nivel internacional.