Estamos todos desexando que termine dunha vez este ano, coma se por encantamento o un de xaneiro fose o inicio dunha nova vida sen pandemia.
Será que levamos o optimismo nos nosos xenes e que non nos resignamos ante os enormes condicionantes e restricións que nos impón o Covid-19.
A resignación é, probablemente, unha característica necesaria ou case indispensable para un científico. Sen ela a ciencia non avanzaría e non chegariamos a superar enfermidades que no pasado mataron a millóns de persoas.
A científica galardoada co Premio Executivas de Galicia 2020, a catedrática de inmunoloxía da Universidade de Vigo África González é, sen ningunha dúbida, unha científica que non se resigna a que a ciencia non sexa capaz de dar resposta a un ataque da natureza do Covid19.
África é doutora en Medicina pola Universidade de Alcalá de Henares, especializouse en inmunoloxía precisamente pola súa paixón por coñecer cales son os mecanismos polos que o noso corpo pode defenderse dun virus e como potenciar esa defensa inmunolóxica. Puido traballar cun Premio Nobel e finalmente aceptou o ofrecemento da Universidade de Vigo para montar o CINBIO (Centro de Investigacións Biomédicas)
É moi posible que vostede a vira ou oído nos medios de comunicación durante todos estes meses de pandemia, explicando a que nos enfrontamos. Esta é un labor case tan importante como a propia investigación.
Vivimos nun estado de confusión permanente desde o mes de marzo: dúbidas e contradicións sobre a orixe do virus, sobre como evitalo, sobre os medicamentos que utilizar, sobre a forma do contaxio. Agora mesmo tampouco temos claro se poderemos xuntarnos coas nosas familias ou non e, o máis importante, a dúbida sobre a eficacia da vacina, que fai que moitas persoas non estean dispostas a poñella.
Hai uns días, nunha entrevista na que participabamos África e esta xornalista, pregunteille: Cando chegue a España a vacina que farás?
-“Serei a primeira en vacinarme”, contestoume sen dubidalo nin un segundo.
Necesitamos que sexan os científicos, os médicos, os expertos quen nos digan o que debemos facer, porque son eles os que teñen o coñecemento necesario para valorar os riscos -se os hai- e recomendar con absoluta imparcialidade.
África recibiu este Premio Executivas 2020 emocionada, porque é o recoñecemento das súas compañeiras, de mulleres que a admiran polo seu traballo, polo seu rigor e esforzo constante para mellorar como profesional e investigadora.
Pero non só pola súa traxectoria, senón pola súa calidade humana, máis presente que nunca. África malgasta empatía e proximidade; é, ante todo, unha gran persoa e iso fai que sexa capaz de transmitirnos ao común dos mortais a complexidade dun virus como o Covid.
Necesitamos centos, miles de científicos como ela, capaces de investigar sen cansazo, pero tamén de explicarnos as cousas máis complexas con sinxeleza, porque só comprendendo a nosa contorna poderemos aprender a vivir coa pandemia.
Foto: @Luis_Cobas
