O próximo 10 de marzo, Executivas de Galicia participará na IV Edición do foro empresarial “Mujeres na Empresa Actual e Futura”. Este evento, organizado polo Círculo de Empresarios de Galicia, contará tamén coa colaboración de organizacións como Empresarias Galicia e Mulleres en Igualdade de Vigo.
O encontro celebrarase de 09:30 a 12:00 na sede do Círculo de Empresarios de Galicia, en Vigo, e poderá seguirse de maneira virtual, facilitando así o acceso a profesionais de toda a comunidade.
A presidenta de Executivas de Galicia, Carla Reyes Uschinsky, xunto coas socias Conchi Vilaboa, socia directora de Auren, e Ana Alonso, vicedirectora xeral en CITIC HIC Gandara Censa, interveñen neste foro co obxectivo principal de analizar, visibilizar e potenciar o papel da muller no ámbito empresarial, destacando a súa contribución á transformación e evolución de cada organización.
Asimesmo, Ángela Caruncho, socia de Executivas de Galicia e Directora en Galicia de Torres e Carrera, será a moderadora do evento. Mediante o testemuño e a experiencia das participantes, debaterase sobre os desafíos, as oportunidades e o impacto do liderado feminino no presente e no futuro do tecido empresarial en Galicia.
Ademais, poñerase en valor o talento feminino como motor de innovación e cambio, promovendo unha contorna de networking que impulse novas sinerxias e reforce o papel da muller na toma de decisións estratéxicas.
Este evento enmárcase dentro dun programa máis amplo de actividades dedicado á comunidade empresarial de Galicia, co propósito de fomentar un espazo de inspiración e colaboración entre os profesionais do sector.
