Executivas de Galicia estivo presente na cerimonia de entrega da IV Edición dos Premios Mulleres no Foco, un evento que recoñece a contribución das mulleres no sector audiovisual. A gala, celebrada no auditorio de Afundación en Pontevedra, e promovida pola Deputación de Pontevedra, xunto coa Asociación de Mulleres Cineastas e Medios Audiovisuais (CIMA), puxo en valor o traballo e a traxectoria de Jaione Camborda, Lidia Fraga e Nati Juncal.
Carla Reyes Uschinsky, presidenta de Executivas de Galicia, e María del Carmen López, do proxecto Referentes Galegas, apoiaron este recoñecemento ao papel da muller na construción dunha industria audiovisual máis igualitaria e diversa.
A cerimonia contou coa presenza de Luis López, presidente da Deputación de Pontevedra, José López Campos, conselleiro de Cultura, e Fabiola García, conselleira de Política Territorial e Igualdade, ademais de representantes institucionais da provincia e membros do sector audiovisual, encabezados por Beatriz Mbula, directiva de CIMA.
A gala, conducida por Carmen Méndez, Ledicia Sola e Marta Doviro, estivo amenizada pola música das Tanxugueiras e a compañía Pablo Méndez Performance.
Durante a súa intervención, Luis López salientou que as galardoadas non só crean historias a través do seu traballo, senón que tamén escriben o guión real da igualdade no sector. “Estamos ante unha longametraxe colectiva que aínda non chegou ao seu fin: a conquista da igualdade real e efectiva”, afirmou.
O evento concluíu cun chamamento para seguir impulsando a presenza feminina no audiovisual, consolidando os Premios Mulleres no Foco como un referente na promoción do talento feminino.