Executivas de Galicia e a Confederación de Empresarios de Galicia (CEG) formalizaron un convenio de colaboración estratéxico para impulsar e difundir o directorio “Referentes Galegas”. Este acordo non só reforza a estrutura da nosa asociación, senón que consolida un compromiso compartido pola visibilización do talento feminino no tecido empresarial da comunidade.
Un directorio vivo ao servizo da sociedade
“Referentes Galegas” é un inventario vivo de mulleres que, pola súa traxectoria e valía, serven de modelo para as futuras xeracións. O obxectivo é que este directorio funcione como unha ferramenta práctica para que organismos, empresas e medios de comunicación localicen a expertas de distintos sectores cando necesiten:
-
- Intervencións profesionais e valoracións técnicas.
- Participación en mesas redondas, debates e xornadas.
- Integrantes para xurados e comités de decisión.
“A visibilidade do talento feminino é clave para construír unha economía máis competitiva e innovadora. Con este convenio queremos que o talento das nosas profesionais sexa cada vez máis accesible e recoñecido nos espazos onde se toman as decisións.” — Carmen Costas, Presidenta de Executivas de Galicia.
Compromisos do convenio
En virtude deste acordo, a CEG convértese nun aliado fundamental para a difusión do directorio entre os seus asociados. Ademais, a Confederación:
- Autoriza o establecemento do domicilio social de Executivas de Galicia na súa sede de Santiago de Compostela.
- Comprométese a utilizar de forma activa o directorio para contar con profesionais do mapa de Referentes nas súas propias actividades e eventos.
Un valor competitivo para a empresa galega
Pola súa banda, o presidente da CEG, Juan Manuel Vieites, destacou que a igualdade de xénero é un factor crave de xestión empresarial e un valor competitivo. Ambos os organismos coinciden na necesidade de eliminar barreiras estruturais e fomentar a presenza feminina en sectores estratéxicos como o tecnolóxico e o STEM, asegurando que o liderado das mulleres non sexa algo conxuntural, senón un trazo estrutural de Galicia.
Este paso adiante reforza a nosa misión: que a voz das mulleres expertas non sexa a excepción, senón parte dun repertorio amplo que inspire e transforme a nosa economía.