O pasado mes de setembro desde Executivas de Galicia puxemos en marcha a segunda edición de “Xerando Redes”, en colaboración coa Deputación de Ourense.
Xerando Redes é un proxecto de emprego para mulleres maiores de 45 anos que finaliza este mes de novembro. O seu obxectivo é poñer en valor o talento senior á vez que fomentar a empregabilidade das mulleres maiores de 45 anos que actualmente supoñen a maior taxa de desemprego desde que hai rexistros e o 60 % do desemprego total feminino.
O proxecto inclúe mentorías para mulleres maiores de 45 anos desempleadas, formacións grupais, charlas inspiradoras, realización de prácticas non laborais en empresas e un networking final.
O día 4 de decembro, ás 09:30 horas, terá lugar o acto de clausura no que contaremos coa intervención de Marta Nóvoa Iglesias, Vicepresidenta Primeira da Deputación de Ourense e deputada delegada de Facenda, Economía, e RRHH e a presidenta de Executivas de Galicia, Carla Reyes Uschinsky.
As mulleres que participaron en Xerando Redes contarannos os seus proxectos futuros e finalizaremos cun café – networking no que compartir e crear sinerxias.
O acto, ao que asistirán as participantes do proxecto, titoras e mentoras, socias de Executivas de Galicia e demais persoas convidadas, terá lugar no Centro Cultural Marcos Valcárcel de Ourense e supón unha oportunidade para coñecer de primeira man o desenvolvemento deste proxecto.
A entrada é gratuíta e aberta ao público en xeral, pero para poder asistir é necesario confirmar asistencia antes do 02/12/24 ás 12:00 horas na ligazón que aparece máis abaixo.